Nesta edición participan estudantes dos nove colexios de Educación Primaria de Narón, cun total aproximado de 300 escolares, que ao longo dos meses de xaneiro, febreiro e marzo reciben formación específica nas aulas como preparación para esta actividade. O programa ten como obxectivo reforzar, dun xeito lúdico e participativo, coñecementos relacionados coa educación viaria, o respecto polo medio ambiente, os primeiros auxilios, as matemáticas aplicadas e o uso do inglés vinculado á mobilidade. A iniciativa busca fomentar entre o alumnado condutas seguras, responsables e sostibles na súa vida diaria. As Olimpíadas estrutúranse en diferentes probas educativas, entre as que se inclúen unha proba teórica a través da plataforma Kahoot, a actividade creativa Aula en Xogo, o xogo participativo A Palabra Oculta e unha proba práctica consistente nunha xincana de bicicletas, que se desenvolve nos propios centros escolares. A final das VII Olimpíadas Escolares de Seguridade Viaria terá lugar o próximo 25 de marzo no Pazo da Cultura de Narón, onde os centros participantes competirán nun evento colectivo que servirá tamén como espazo de convivencia e intercambio entre o alumnado dos distintos colexios. Con esta iniciativa, o Concello de Narón reforza a súa aposta por unha educación viaria integral desde idades temperás, como clave para mellorar a seguridade, a convivencia e a mobilidade no municipio.