A actividade, de carácter gratuíto, ofrece un percorrido de arredor de 14 quilómetros por diferentes parroquias e barrios do municipio. A saída terá lugar ás 10.00 horas desde o Local Social da Solaina, e a chegada está prevista arredor das 13.00 horas na Praza 23 de novembro. O itinerario inclúe as zonas de Santa Cecilia, A Gándara, O Couto, Neda, Xuvia, Piñeiros e Freixeiro, antes de regresar a Santa Cecilia. As persoas interesadas, ata un máximo de 150, poden inscribirse dende hoxe, luns 10 de novembro, e ata o próximo día 18 no Polideportivo de Narón, en horario de luns a xoves de 9.00 a 11.00 e de 17.00 a 18.30 horas. Dende o Concello animan á veciñanza a participar nesta actividade que promove o exercicio ao aire libre, a convivencia e o coñecemento do territorio, coincidindo coa celebración do Día de Narón.