Trátase dun bloque de iniciativas integradas na denominada formación transversal, empregada maioritariamente por empresas auxiliares vinculadas ao sector industrial e naval. No acto estivo presente a concelleira de Formación, Natalia Hermida, que acompañada do director do centro de formación municipal, Ángel Álvarez Soto, recoñeceron o traballo do alumnado que completou estas accións ao longo do ano. A entrega comezou cos diplomas da segunda edición do itinerario completo de Prevención de Riscos Laborais, un programa que finalizaron 18 persoas –15 homes e 3 mulleres, todas de Narón–. No acto outorgáronse os diplomas, incluíndo a homologación de 60 horas de PRL básico, o diploma municipal vinculado á formación específica para o sector naval e as acreditacións dos módulos de traballos en altura e espazos confinados. Seguidamente realizouse a entrega dos diplomas das terceira e cuarta edicións da formación de operador ou operadora de carretillas e plataformas elevadoras con certificación UNE. Finalizaran este programa 18 participantes –12 homes e 6 mulleres–, incluíndo catro persoas desempregadas doutros concellos. A continuación, concedéronse os diplomas correspondentes á segunda edición da formación de operador ou operadora de guindastres de taller, completada por nove persoas (oito homes e unha muller, todas de Narón). As persoas presentes recibiron o diploma municipal do curso completo e tamén o diploma homologado C28, de vinte horas. A sesión pechou coa entrega dos once diplomas da segunda edición do curso de Reposición, caixa e atención en seccións de supermercados, unha das accións máis demandadas da programación municipal, finalizada por quince persoas –doce mulleres e tres homes, todas residentes no municipio–. As persoas asistentes recibiron a súa acreditación tras superar a formación teórica e as cen horas de prácticas en empresa. Durante o acto, a edil responsable da área destacou o impacto positivo destas accións formativas na inserción laboral da veciñanza e lembrou que algunhas delas xa deron lugar a contratacións tras a súa finalización. Hermida puxo en valor a continuidade do Programa Municipal de Formación como ferramenta clave para mellorar a cualificación profesional no municipio e animou a seguir aproveitando os recursos municipais de formación e orientación laboral en próximas convocatorias actualmente en licitación.