A totalidade desta contía destinarase a financiar parte do custo do Servizo de Axuda no Fogar (SAF) na modalidade de dependencia ao longo do exercicio 2026, un servizo esencial que permite atender persoas maiores e con dependencia no seu propio domicilio, favorecendo a súa autonomía e permanencia na súa contorna habitual. Desde o Concello explican que o custo do SAF experimentou un incremento significativo nos últimos anos, debido tanto ás subas do IPC como aos aumentos do Salario Mínimo Interprofesional. Ademais, Narón está a tramitar unha nova licitación do servizo, ao rematar a vixencia do contrato actual, o que suporá un maior esforzo económico para as arcas municipais. O gasto total previsto para o SAF-Dependencia en 2026 supera os 3,6 millóns de euros, dos cales unha parte se financia con fondos da Xunta de Galicia e co copagamento das persoas usuarias. Con todo, o Concello de Narón asume con fondos propios máis de 1,6 millóns de euros, polo que a achega da Deputación resulta clave para garantir a sustentabilidade do servizo. O acordo plenario inclúe a aceptación das bases do plan provincial e a autorización á Alcaldía para realizar todos os trámites necesarios para a súa solicitude e xestión. O Concello comprométese tamén a facer constar a colaboración da Deputación da Coruña na información relativa ás actuacións financiadas con cargo a esta achega. Desde o goberno local destacan que Narón vén accedendo a esta liña de financiamento desde o ano 2021, o que permite reforzar de maneira continuada un servizo social básico e dar resposta ás necesidades das persoas máis vulnerables do municipio.