Mércores, 18 de marzo de 2026. As accións formativas están dirixidas a persoas maiores de 18 anos, desempregadas e empadroadas no municipio, e desenvolveranse entre os meses de abril e maio. O prazo para presentar solicitudes permanecerá aberto ata o 27 de marzo ás 13:30 horas. As persoas interesadas poden tramitar a inscrición a través do Rexistro Xeral do Concello, da sede electrónica municipal ou polos restantes medios previstos na Lei 39/2015 do procedemento administrativo común. Un dos cursos ofertados é un itinerario formativo en prevención de riscos laborais que suma un total de 107 horas. Inclúe a formación básica en prevención de riscos laborais (60 horas), un módulo de prevención de riscos e medio ambiente no sector naval (16 horas) e outro sobre traballos en altura e espazos confinados (16 horas). Ademais, incorpora contidos transversais de igualdade de oportunidades, emprendemento e orientación laboral, así como dúas visitas a empresas e dúas charlas formativas. Este itinerario desenvolverase entre o 7 de abril e o 11 de maio, con horario de mañá. Desde o 7 ao 24 de abril e o 8 de maio as clases serán de 9:00 a 14:00 horas, mentres que entre o 27 de abril e o 7 de maio se impartirán de 9:00 a 13:00 horas. A última xornada adaptarase ás visitas programadas a empresas. A segunda acción formativa é o curso de preparación de competencias clave de nivel 2, cunha duración total de 215 horas. O programa inclúe formación en competencia matemática (70 horas), comunicación en lingua castelá (65 horas) e comunicación en lingua galega (65 horas), ademais dun módulo de orientación laboral, busca de emprego e emprendemento de 15 horas e actividades complementarias como visitas e charlas. Este curso impartirase do 7 de abril ao 29 de maio, tamén nas instalacións do centro Irmás Froilaz, en horario de 8:30 a 14:30 horas de luns a venres. Terán prioridade para acceder ás prazas as persoas inscritas nas probas de avaliación de competencias clave convocadas pola Xunta de Galicia para o acceso aos certificados de profesionalidade de nivel 2. Ambas accións formativas ofertan 20 prazas e o Concello reserva un 20% para derivacións do Servizo Sociocomunitario. A selección do alumnado realizarase por rigorosa orde de inscrición no rexistro. No caso de non cubrirse polo menos o 60% das prazas, o Concello resérvase a posibilidade de anular a formación. As persoas admitidas deberán acreditar antes do inicio do curso a súa condición de demandantes de emprego mediante a correspondente tarxeta actualizada. Para máis información pódese consultar a sección de Servizos, Formación e Actividades Municipais da páxina web municipal ou contactar co Servizo Sociocomunitario no teléfono 981 33 77 00, extensións 1108 e 1109.