Xoves, 14 de maio de 2026. A competición está organizada pola Federación Galega de Tenis de Mesa coa colaboración do Club Tenis de Mesa Narón e do Padroado de Deportes. O campionato foi presentado este xoves polo concelleiro de Deportes, Ibán Santalla, e o presidente do Club Tenis de Mesa Narón, Fernando Montero, que destacou a importancia de que Narón continúe acollendo eventos deportivos de primeiro nivel. Montero agradeceu a implicación do Concello na organización desta competición remarcando que “o Concello de Narón sempre apoia este tipo de eventos deportivos, algo fundamental para que podamos seguir organizando campionatos de referencia e traer á cidade os mellores deportistas galegos”. No campionato participarán un total de 44 xogadores: 32 na categoría masculina e 12 na feminina. Ademais dos representantes locais, o torneo reunirá deportistas procedentes de Pontevedra, Vigo, Lugo, Mos, Santiago de Compostela e Oroso, así como un deportista galego pertencente a un club das Illas Baleares. Desde a organización salientaron o alto nivel competitivo do torneo, no que se darán cita algúns dos mellores xogadores e xogadoras do panorama autonómico, convertendo a competición nun importante escaparate para o tenis de mesa galego. O edil de Deportes, Ibán Santalla, puxo en valor o traballo desenvolvido polo club local e destacou a relevancia de que Narón continúe sendo sede de eventos deportivos de carácter autonómico, tanto polo impacto deportivo como pola proxección da cidade e a actividade que xeran este tipo de competicións.