Xoves, 21 de maio de 2026. Trátase do espectáculo “Eu tampouco navegar”, a cargo de Caxoto Contacontos, unha das propostas máis recoñecidas de narración oral dirixida a público infantil en Galicia. A sesión propón unha viaxe pola palabra contada na que se revisitan mitos clásicos e historias tradicionais reinterpretadas desde unha ollada contemporánea, conectando coa obra e co pensamento de Caamaño. A través de dinámicas participativas, humor e xogos narrativos, a actividade introduce tamén pequenas reflexións arredor da igualdade e da construción dos relatos, ao tempo que reivindica o valor da lingua galega como ferramenta de creación e imaxinación. Caxoto Contacontos é o proxecto artístico do narrador e actor Avelino González, unha figura consolidada no ámbito da narración oral en Galicia. Cunha traxectoria extensa en bibliotecas, centros educativos e festivais, o seu traballo caracterízase pola capacidade de adaptar historias ao público infantil e familiar. Esta actividade está dirixida a nenos e nenas a partir de 4 anos e será necesaria reserva previa de forma presencial ou a través do teléfono 981 382 173 en horario de apertura da biblioteca.