Narón, 30 de maio de 2024. A concelleira de Benestar Social, María Lorenzo, avanzou que o vindeiro venres, día 7 de xuño, terá lugar no local social do Alto do Castiñeiro unha conferencia participativa de reflexións sobre ocupación e saúde mental. “Por que e para que nos levantamos pola mañá?” é o título desta conferencia, organizada polo Concello e que se desenvolverá dende as 19:00 ata as 20:30 horas. A encargada de impartir a charla será Nuria García, terapeuta ocupacional do hospital de día de psiquiatría na Área Sanitaria de Ferrol. A ponente coordina grupos e proxectos de participación colectiva e tamén imparte clases na Universidade da Coruña. A iniciativa enmárcase no obradoiro Encontros de Mulleres e ten entre os seus obxectivos a prevención do deterioro da saúde mental. A convocatoria está aberta á participación da cidadanía en xeral, ata completar a capacidade do local.