Narón, 11 de marzo de 2025. A concelleira de Igualdade, María Lorenzo, desprazouse ao Centro Comercial Odeón para visitar xunto coa xerente das instalacións, Cristina Imaz, a exposición de paneis que o Concello realizou con motivo do 8M, Día Internacional da Muller. A mostra, que ten carácter itinerante, poderase ver nas citadas instalacións ata o vindeiro 20 de marzo, tal e como indicou a edil. Os paneis ofrecen información das mulleres homenaxeadas en Narón con motivo do 8M, como Mulleres do Ano de Narón, dende o ano 2016 ata este ano, cando a distinción recaeu por unanimidade da corporación local en Ana Isabel Ares Pernas, licenciada en Ciencias Químicas pola USC e vicerreitora do Campus de Ferrol na actualidade. A concelleira de Igualdade animou á cidadanía a achegarse a Odeón para visitar esta mostra, “na que se destaca o labor e a traxectoria profesional e persoal de moitas mulleres da nosa cidade”. Así mesmo, María Lorenzo avanzou que esta mesma exposición se poderá ver do 20 -pola tarde- ao 30 de marzo na Praza da Igualdade, na Gándara.