Esta primeira edición contou con alumnado procedente de países como Colombia, Arxentina ou Francia, así como doutras comunidades do Estado, como Segovia ou Cáceres. A clausura do curso contou coa participación da alcaldesa de Narón, Marián Ferreiro, que lles desexou ás persoas participantes o mellor nesta nova etapa, animándoas a seguir empregando o galego no seu día a día. O programa, desenvolvido entre o 1 de outubro e o 17 de decembro, contou cun total de 30 horas de formación dirixidas a persoas maiores de idade que se aproximaban por primeira vez á lingua e á cultura de Galicia. O obxectivo principal foi facilitarlles ferramentas básicas de comunicación e coñecementos acerca da cultura galega que favorezan a súa integración social. Ao longo do obradoiro, o alumnado puido aprender a presentarse en galego, a desenvolverse en situacións cotiás como pedir nunha cafetería ou facer a compra nunha tenda, ademais de familiarizarse cos costumes, tradicións e manifestacións culturais do país, incluída a música galega. A dimensión cultural do programa completouse con varias visitas guiadas ao CIMIX e ao Pazo da Cultura, nas que se abordaron contidos como a historia e a relevancia do muíño de Xuvia para a comarca, así como o proxecto cultural que impulsa o Padroado da Cultura de Narón. O obradoiro foi impartido por una técnica do SNL municipal no local da Asociación de Veciños Chafarís, reafirmando así o compromiso do Concello de Narón coa promoción do galego.