MINUTO DE SILENCIO ANTE O CONCELLO COMO MOSTRA DE SOLIDARIEDADE COAS VÍTIMAS DO ATENTADO DE LONDRES
Representantes da corporación local e persoal funcionario e interino do Concello gardaron un minuto de silencio para condenar os atentados
Narón, 5 de xuño de 2017. Representantes da corporación local de Narón, co alcalde accidental, Guillermo Sánchez Fojo, á cabeza, gardaron esta mañá, ás 12.00 horas, un minuto de silencio ante a porta principal do Concello como mostra de solidariedade coas vítimas do atentado rexistrado na noite do pasado sábado en Londres. Á convocatoria asistiron tamén funcionarios e persoal interino da administración local.
A Federación Española de Municipios e Provincias (FEMP) dirixiu un escrito esta mañá aos Concellos para convocar este acto, “en defensa da liberdade, democracia e convivencia”, e co fin de rexeitar calquera tipo de manifestación de violencia.
O Estado Islámico asumiu a autoría do atentado, no que os terroristas mataron a sete persoas e resultaron feridas corenta e oito, das que vinte e unha permanecen en estado crítico.