Narón, 24 de maio de 2024. As familias que desexen participar este verán no programa “Vacacións en Paz”, impulsado dende a asociación Solidariedade Galega co Pobo Saharaui (Sogaps) e no que colabora o Concello, deben anotarse antes de finais deste mes. Así o recordaron a concelleira de Benestar Social, María Lorenzo, e a representante na zona de Sogaps, Maite Martínez. As persoas interesadas poden recibir máis información do programa ou anotarse a través dos teléfonos 678 727 382 ou 986 262 637, podendo tamén dirixirse ao correo electrónico: asociacionsogaps@yahoo.es. O vindeiro mes de xuño está prevista a chegada á cidade de menores de entre 8 e 12 anos que residen nos campamentos de refuxiados saharauis de Tinduf (Arxelia), e permanecerán en Narón ata o mes de setembro, cando regresarán de novo coas súas familias. Durante a súa estadía na cidade os menores acudirán a revisións médicas e participarán en diferentes actividades coas súas familias de acollida, afastados das elevadas temperaturas que se alcanzan durante o verán nos campamentos de refuxiados, que poden superar os 50 graos.