Narón, 10 de xuño de 2024. A Biblioteca municipal abrirá mañá martes o prazo para inscribirse no obradoiro “As lendas de San Xoán”, dirixido a menores a partir de 4 anos. A edil responsable da área, Olga Ameneiro, explicou que a actividade se levará a cabo este sábado, día 15, na propia Biblioteca ás 11:00 horas. Neste obradoiro infantil daranse a coñecer o nome das sete herbas máxicas e as súas propiedades e tamén algunha das lendas asociadas ao día de San Xoán. As nenas e nenos realizarán tamén unha luminaria de cartulina que saltarán, como marca a tradición, recitando algunhas frases populares asociadas a esta data. As reservas de praza poden facerse dende mañá ás 16:00 horas na Biblioteca, de xeito presencial, ou chamando ao número de teléfono 981 382 173. As nenas e nenos deben ter o carné da rede de Bibliotecas sen sancións pendentes para poder anotarse.