Narón, 3 de abril de 2025. Máis de 700 escolares de dez centros de ensino da cidade participan dende hoxe nos obradoiros sobre velutinas impartidos por persoal do departamento de Prevención do Concello de Narón e da delegación en Ferrolterra da Asociación Galega de Apicultura, en colaboración co equipo de Educación Viaria de Narón. O concelleiro responsable da área, José Oreona, explicou que se dirixen a nenas e nenos de terceiro a sexto curso de educación primaria e que teñen entre os seus obxectivos ensinarlles a facer trampas caseiras para combater a proliferación da vespa velutina. Nesta ocasión participa alumnado dos colexios da Solaina, Jorge Juan, Virxe do Mar, Piñeiros, O Feal, Ponte de Xuvia, CRA do Val, Ayala, A Gándara e Santiago Apóstol, en sesións que se imparten durante un período aproximado de 50 minutos. Hoxe comezaron estes obradoiros no colexio da Solaina, onde a partir das 9:50 horas se levaron a cabo ao longo da mañá, asistindo un total de 191 escolares. Na xornada de mañá venres participarán nos obradoiros 85 alumnos do colexio Jorge Juan, tamén a partir das 9:50 horas. As seguintes sesións programadas serán o vindeiro luns día 7 no colexio Virxe do Mar, o día 8 no de Piñeiros, o 9 nos do Feal, Ponte de Xuvia e CRA do Val, o 10 no Ayala e finalmente o 11 na Gándara e no Santiago Apóstol. No transcurso destes obradoiros, dende AGA Ferrolterra explícanlles aos rapaces e rapazas como chegaron as velutinas, a evolución desta especie, o perigo que representa a súa proliferación e a necesidade de trampear durante determinada época do ano para capturar as raíñas e tratar de erradicalas. Unha vez finalizadas as explicacións, dase paso á parte práctica, na que utilizando materiais reciclados –botellas de plástico- aprenden a facer as trampas e tamén coñecen o atraínte a meter nas mesmas para capturalas, a base de auga tibia, fermento e azucre. Sobre todo este proceso, os escolares reciben tamén información a través dun tríptico editado polo Concello sobre esta área. O edil de Seguridade Cidadá incidiu “na importancia de que esas trampas se coloquen coa chegada da primavera nas hortas e xardíns porque deste xeito podemos reducir dun xeito considerable, ata nun 75% según din expertos nesta materia, a aparición de niños de vespa velutina”. Así mesmo, Oreona agradeceu “a colaboración e implicación dos centros de ensino da cidade, porque sen eles non sería posible impartir esta formación que consideramos tan importante entre o colectivo escolar”.