Narón, 4 de abril de 2025. Uns 350 escolares de once centros de ensino de Narón participan nos obradoiros de murais que se levan a cabo no marco do Programa de recursos educativos de apoio á escola impulsados polo Concello de Narón. A proposta consiste, tal e como indicou a edil de Ensino, Olga Ameneiro, en realizar un mural nalgún espazo do colexio durante o período escolar para decoralo a través dunha manifestación pictórica creada coa base do traballo comunitario do alumnado. Os murais lévanse a cabo entre os meses de decembro e xuño nos colexios Ayala, Virxe do Mar, A Solaina, A Gándara, Santiago Apóstol, Ponte de Xuvia, Jorge Juan, Piñeiros, CRA (escolas do Val e Domirón) e o IES As Telleiras. Alumnado de terceiro a sexto curso de educación primaria e de cuarto da ESO –no caso do IES- é o que se encarga de decorar estes espazos, tal e como apuntou a edil naronesa. “Unha das finalidades desta actividade é contribuír no desenvolvemento da creatividade artística das nenas e nenos, ao tempo que fomentamos o traballo en grupo e a posibilidade de que sexan eles os que tomen determinadas decisións sobre o xeito no que levan a cabo as tarefas encomendadas”, explicou Ameneiro. A concelleira agradeceu a implicación dos centros de ensino participantes neste programa e a súa colaboración.