Narón, 16 de outubro de 2025. Preto de 400 escolares de educación Primaria de Narón participan nas saídas en bici organizadas polo Concello, a través da Concellería de Seguridade Cidadá, dirixida por José Oreona, co equipo de Educación Viaria de Narón. A responsable do mesmo, Sonia López, acompaña ás nenas e nenos nesta iniciativa, que se iniciou o pasado mes de setembro e que rematará o vindeiro día 27. Protección Civil e a policía Local de Narón colaboran tamén nesta proposta. Menores de primeiro a sexto de educación Primaria e de quinto e sexto de educación Infantil son os destinatarios destas saídas en bicicleta polo termo municipal. Os escolares que participan son os dos colexios da Solaina, Jorge Juan, Ponte de Xuvia, A Gándara, O Feal, Ayala, Santiago Apóstol, Piñeiros e Virxe do Mar. As rutas desenvólvense sempre en horario lectivo, de luns a venres, e teñen unha duración de entre dúas e tres horas. Os tanques de tormentas de Xuvia e de Gándara, o paseo de Xuvia, as instalacións do pump track e as pistas de Río Seco son os destinos dos diferentes grupos. O edil de Seguridade Cidadá valorou esta iniciativa e incidiu en que “ten unha moi boa acollida nos centros de ensino, aos que agradecemos a súa colaboración e, por suposto, aos nenos e nenas pola súa boa disposición para coñecer o noso entorno, o noso patrimonio”. Así mesmo, destacou a implicación do traballo realizado para poder levar a cabo estas saídas en bici.