A cabalgata partirá ás 18.00 horas dende o CEIP de Xuvia e avanzará pola estrada de Castela ata a praza de Galicia, onde terá lugar a tradicional recepción real a Melchor, Gaspar e Baltasar. Durante o percorrido, as rúas iranse transformando nun escenario no que se mesturarán luz, movemento e personaxes saídos do universo dos contos. A comitiva real estará integrada por sete carrozas e cinco espectáculos profesionais de gran formato: ‘Estrelas’, que abrirá o desfile cun ceo luminoso en movemento; ‘A danza das Cartas’, coa Carteira Real e as súas cartas danzantes como fío condutor dos primeiros desexos da infancia; ‘Candore’, un espectáculo dominado pola luz branca e a percusión en directo; ‘Cores da Noite’, con figuras sobre zancos que debuxan coreografías de luces no crepúsculo; e ‘Atalantes’, unha escena inspirada no mundo mariño que traerá ás rúas seres chegados do fondo do océano. Xunto a estas montaxes profesionais, a cabalgata contará cunha ampla presenza de participantes locais. Tomarán parte a Banda de Gaitas de Narón e a Banda de Música da Agrupación Cultural Musical Sementeira, que poñerán banda sonora ao percorrido, así como a Escola da Danza de Narón, presente con cinco combos diferentes que intervirán en varias escenas da comitiva. A danza completarase coa participación de Amei Escola de Danza, integrada na escena inspirada nas Mil e unha noites. A implicación da cidadanía volverá ser un dos sinais de identidade da cabalgata. Un total de 45 persoas voluntarias, elixidas mediante sorteo, participarán activamente no desfile: 36 formando parte das carrozas e 9 como paxes, ademais doutros personaxes que acompañarán as distintas escenas. A proposta inclúe tamén a presenza de Gulliver e os lilliputienses, como lembranza e promoción do Gulliver Festival, unha cita cultural que se celebra anualmente en Narón e que sitúa o municipio como referente das artes de rúa. Ferreiro destacou o carácter colectivo desta cabalgata, na que conviven espectáculos profesionais, escolas locais e veciñanza, e animou a asistir tanto ao percorrido como á recepción aos Reis Magos na praza de Galicia, que porá o ramo a unha tarde pensada para ser compartida en familia.