Xoves, 19 de febreiro de 2026. A actuación foi recentemente inaugurada pola municipalidade de Heredia coa participación directa da veciñanza e da comunidade educativa, e mesmo foi recollida pola televisión nacional do país centroamericano, que destacou o carácter educativo e comunitario do proxecto. Durante a emisión, a xestora responsable da iniciativa explicou que o corredor activo “nace do convenio que temos con Narón, España”, subliñando que o traballo consistiu en adaptar ao contexto local os modelos de seguridade viaria e mobilidade sostible compartidos polo municipio galego. O novo espazo combina ocio e aprendizaxe mediante xogos de chan, sinalizacións viarias adaptadas á infancia, circuítos ciclistas e elementos lúdicos que permiten aprender as normas de circulación dunha maneira participativa. Segundo explicaron desde a organización do proxecto na reportaxe televisiva, o obxectivo é que nenos, nenas e tamén persoas adultas interioricen hábitos de mobilidade segura e sostible mentres utilizan un espazo público pensado para o encontro veciñal. A iniciativa contou coa implicación de centros educativos da zona —entre eles as escolas José Figueres Ferrer, Mercedes Norte e Mercedes Sur— así como de artistas e residentes, que participaron no deseño e pintado do corredor. A cooperación entre Narón e Heredia remóntase a 2019, cando ambas cidades iniciaron un proceso de intercambio de coñecementos en educación e seguridade viaria que culminou posteriormente nun protocolo oficial de irmanamento e colaboración. Este acordó contempla o desenvolvemento conxunto de programas relacionados coa mobilidade segura, a infraestrutura viaria, a convivencia cidadá e diferentes iniciativas educativas. Nun encontro institucional celebrado en marzo de 2025, a alcaldesa de Narón, Marián Ferreiro, destacaba que o traballo realizado polo equipo municipal de Educación Viaria —integrado, entre outros profesionais, por Pedro Caneiro e Sonia López— tense convertido nun referente exportable a outras cidades. Pola súa banda, a alcaldesa de Heredia, Ángela Aguilar, xa subliñaba daquela que a colaboración co municipio galego permitira implementar obradoiros e corredores activos en centros educativos, facendo máis atractiva a aprendizaxe da seguridade viaria entre a infancia. O proxecto dos corredores de mobilidade activa en Heredia xa obtivo recoñecementos no país centroamericano, incluíndo premios vinculados á arquitectura e á infancia por iniciativas baseadas en xogos educativos deseñados coa participación directa dos menores. Estes proxectos, desenvolvidos co asesoramento do equipo naronés, apostan por integrar educación, urbanismo e participación cidadá para promover cambios culturais na forma de entender a mobilidade urbana. A nova actuación en Mercedes Norte consolida así a transferencia internacional do modelo de educación viaria impulsado desde Narón, demostrando —segundo destacan desde ambas administracións— que a cooperación municipal pode contribuír a crear cidades máis seguras, sostibles e orientadas ás persoas, especialmente á infancia.