Xoves, 16 de abril de 2026. Trátase do obradoiro “Bombas de sementes”, unha proposta que se desenvolverá a partir das 11.00 horas no centro cívico social do Couto e que está pensada para nenas e nenos de entre 6 e 12 anos, que deberán asistir acompañados dunha persoa adulta. A actividade consistirá na elaboración de bombas de sementes a través da técnica coñecida como ‘Nendo Dango’, un método de orixe xaponesa creado polo agricultor e biólogo Masanobu Fukuoka co obxectivo de favorecer a reforestación e a recuperación de ecosistemas de maneira natural. Estas pequenas bólas, feitas a base de arxila, terra e sementes, protexen o seu interior das condicións ambientais e dos depredadores ata que se dan as circunstancias axeitadas para a xerminación. Deste xeito, convértense nunha ferramenta sinxela e eficaz para espallar vexetación e contribuír á biodiversidade. O obradoiro estará impartido pola cooperativa galega SomosTerra, unha entidade especializada en educación ambiental e dinamización de actividades vencelladas ao coñecemento do medio natural e á sustentabilidade. A través de propostas prácticas e participativas, o colectivo busca sensibilizar a cidadanía, especialmente as novas xeracións, sobre a importancia de coidar a contorna natural e adoptar hábitos respectuosos co medio. A iniciativa enmárcase no proxecto Guizo, unha proposta municipal que promove o uso do galego entre a cativada a través dun lecer educativo, creativo e en contacto coa natureza. As actividades son de balde, mais requiren inscrición previa a través do enderezo electrónico a.pita@naron.gal, e as prazas adxudícanse por orde de solicitude. O programa continuará nas próximas semanas con novas citas: o 23 de maio terá lugar o obradoiro “Os superpoderes das aves” de Alouette Machine, centrado na imprenta creativa e no coñecemento dos paxaros, e o 13 de xuño pecharase o ciclo cun obradoiro de cociña solar a cargo de Os Picos do Sol, no que as familias poderán achegarse ao uso desta enerxía renovable dun xeito práctico e didáctico.