CORTE DE TRÁFICO NO CAMIÑO DO LODAIRO DURANTE DOUS MESES POLAS OBRAS DO CENTRO DE SAÚDE
A medida, operativa a partir de mañá 9 de maio, estará en vigor de luns a venres en horario de 7.30 a 20.30 horas
Narón, 8 de maio de 2019. O tramo inicial do Camiño do Lodairo, dende o acceso da estrada de Castela, pecharase a partir de mañá ao tráfico rodado durante dous meses debido ao inicio das obras de construción do novo centro de saúde da cidade. O corte manterase vixente de luns a venres, en horario de 7.30 a 20.30, tal e como se indicou dende o departamento de Seguridade Cidadá que dirixe o edil Guillermo Sánchez Fojo.
Na actualidade estanse realizando tarefas de movementos de terra na parcela donde se ubicarán as novas instalacións sanitarias, polo que a maiores procederase a regular o tráfico rodado –debido á continua entrada e saída de vehículos pesados- con persoal da empresa que executa as obras e tamén con semáforos de obra que se instalarán na zona nese mesmo período de execución dos traballos.
Desde o Concello solicítanse desculpas polas molestias que se poidan ocasionar mentres se levan a cabo estas tarefas.